DEPUTAT:"APREL DÖYÜŞLƏRİNDƏ RUSİYA AZƏRBAYCANA MANE OLMAMALI İDİ" - REALLIQ
Fərəc Quliyev:"Moskva Bakının artan nüfuzundan, Qərbə inteqrasiyasından ehtiyat edir, dövlətimizi öz orbitində saxlamağa çalışır”
"Rusiya Azərbaycanla münasibətlərində heç vaxt səmimi olmayıb”.
Bunu "Sherg.az”a Rusiya Xarici İşlər Nazirliyinin Azərbaycana ölkənin daxili işlərinə müdaxilə ilə bağlı məlumatları bu cür hallara reaksiya verməli olan beynəlxalq strukturlara göndərmək barədə məsləhətindən danışarkən millət vəkili Fərəc Quliyev söyləyib.
O diqqətə çatdırıb ki, Rusiya Dağlıq Qarabağ münaqişəsinin həlli prosesində bitərəf mövqe tutmalı olduğu halda işğalçı dövlətlə əməkdaşlıq edir:
"Ermənistanın qeyri-qanuni şəkildə silahlanmasında, Azərbaycan torpaqlarını işğal etməsində Rusiyanın rolu məlumdur. Rusiya XİN-in məsləhətində sətiraltı mesaj verilir ki, başqaları bu işə qarışmasın, problemin açarı Rusiyadadır. Şimal qonşumuz bununla "Məndən başqa kimsə qarışmasın” deyir. Hesab edirəm ki, Azərbaycanın daxili işlərinə Rusiya da daxil olmaqla heç bir ölkə qarışmamalıdır. Azərbaycan aprel döyüşlərində Ermənistana qarşı tədbirlər görəndə, Rusiya əl-qolunu çırmalayıb, bizə mane olmamalı, daxili işlərimizə qarışmamalı idi”.
F.Quliyev Rusiya XİN rəhbəri Sergey Lavrovun italiyalı həmkarı, ATƏT-in fəaliyyətdə olan sədri Ancelino Alfano ilə müzakirələrinə də münasibət bildirib. O xatırladıb ki, Dağlıq Qarabağ münaqişəsi ətrafında bu cür müzakirələr 20 ildən çoxdur aparılır:
"Mənasız bəyanatlar verilir. Heç bir ölçü götürülməyib. Onlar Azərbaycana təzyiqləri davam etdirir, bununla Rusiyanın regional layihələrinə daxil etməyə çalışırlar. Bir sözlə, Rusiya Azərbaycanın artan nüfuzundan, Qərbə inteqrasiyasından ehtiyat edir, dövlətimizi öz orbitində saxlamağa çalışır”.
Qeyd edək ki, Rusiya XİN başçısı ATƏT sədri ilə görüşdə ATƏT məkanındakı münaqişələri müzakirə etdiklərini söyləyib: "Bizim birgə səylərimizlə ATƏT Dnestryanıda, Dağlıq Qarabağda münaqişələrin qarşısını almağa töhfə verməyə, Cənubi Qafqazda təhlükəsizliyin təmin olunması ilə bağlı Cenevrə müzakirələrinə sədrlik etməyə davam edəcək.
